شركة مكافحة حشرات

شركة مكافحة حشرات

يعتبر التعامل مع شركة مكافحة الحشرات من المواضيع التي تشغل الكثير من طالبي الخدمة وما ينتج غالبا من ذلك التعامل خاصة بعد سماع العديد من المشاكل عن شركات مكافحة الحشرات ذات الاسماء الملفته للانتباه ونجاحهم في اقناع وتثبيت أفكار عن المبيدات المستخدمه أنها مستوردة وذات فعاليه عاليه على الرغم من حدوث العكس وفشل الشركة التي تقوم بعملية مكافحة الحشرات فيفاجأ العميل بعدم نجاح الشركة في القضاء على الحشرات المسببه له القلق والازعاج وبعد محاولات منه للاتصال بالشركة مره اخرى تنتهي المشكلة بفقدان الثقه في تلك الشركة ومعظم الشركات اللتي تقدم تلك الخدمة وتصبح كلمات غير لائقة هي البديل لإسم الشركة المقدمة للخدمة بجانب خسارة المبلغ المدفوع للشركة مقابل تقديم الخدمة ولتجنب ذلك ينبغي عليك من البداية الحرص كالتالي  .اقصد بذلك مثلا اذا كنت تعاني من وجود صراصير في منزلك ينبغي عليك القيام  بأي طريقه من الطرق البسيطه للتخلص من الحشرات ( إطلع على الصفحات الأخرى ) لمعرفة حل تلك المشكلة – وإذا لم يكن لديك الوقت الكافي هنا ينبغي اللجوء لشركة مكافحة حشرات والمبيدات ..

كيف تحصل على أرقام شركات مكافحة الحشرات ؟

في الوقت الحالي الجميع يستخدم الانترنت للحصول على أي معلومة في شتى المجالات ويعتبر محرك البحث جوجل من أكثر وأشهر موفري خدمة البحث عن المعلومات وأيضا تعتبر وسائل التواصل الاجتماعي والاعلانات المدفوعه اللتي تقوم بها جميع الشركات في شتى المجالات كل ذلك يعتبر قاعدة بيانات بسيطه للمستهلك أو طالب الخدمة .

مثلا أكتب في محرك البحث جوجل ( شركة مكافحة حشرات في ......... إكتب اسم الدولة أو المحافظة أو المدينة اللتي تعيش فيها و اللتي تريد أن تستقبل الخدمه فيها ...

هيظهر لك العديد من الخيارات فيمكنك أخذ أرقام تلك الشركات والاتصال بهم مباشرة والتحدث معهم كما سنوضح لاحقا أو يمكنك البحث مرة أخرى بنفس اسم الشركة لمعرفة ما اذا كانت هناك أي شكاوي ضدها وتم نشرها على الانترنت في إحدى المواقع ( حدث معي بالفعل ووجدت بعض الشركات لها اسم لامع ومشهور في مجال مكافحة وإبادة الحشرات والافات ويوجد عليها أكثر من 5 قضايا مخالفة) 

نعود إلى طريقة المحادثة في مثال بسيط  حقيقي من أحد زملائي مثلا شخص اسمه علي يتحدث في الهاتف مع شركة مكافحة حشرات في القاهرة

 -       عم علي     :- السلام عليكم .. صباح الخير ... شركة مكافحة حشرات ؟

- شركة مكافحة الحشرات :- وعليكم السلام ... ايوا يافندم شركة مكافحة الحشرات والقوارض معاك اتفضل تحت امرك

-       عم علي     :-  معلشي بس قوللي اسم الشركة ايه لاني اتصلت على كذا شركة عشان اشوف الاسعار

- شركة مكافحة الحشرات :- يعني حضرتك بتتصل ومش عارف اسم الشركة

-       عم علي     :- معلشي بقى عشان أتأكد واللا انت عندك مانع ؟

- شركة مكافحة الحشرات :- لا يافندم تحت أمرك إحنا شركة لإبادة الحشرات والقوارض  ....

-       عم علي     :- أي سفاره بالضبط لأني كلمت كذا شركة وكللهم بيقولو شركة .... متكرره في كذا شركة

- شركة مكافحة الحشرات :- حضرتك بتتصل تحقق معانا واللا ايه ؟ لو حضرتك عاوز خدمة مكافحة حشرات اتفضل تحت أمرك

-       عم علي     :- أوكي ! أنا عندي مشكلة الصراصير في المطبخ بس .

- شركة مكافحة الحشرات :- ياباشا لازم الشقه كللها تترش عشان الصراصير ما تنتشرش لو عملنا المطبخ بس الصراصير  هتسيب المطبخ وتروح على باقي الشقه .

-       عم علي     :- يعني الدوا بتاعكو ما بيموتش الصراصير زي الكلام اللي في الاعلانات

- شركة مكافحة الحشرات :- احنا شركة مشهوره ومعروفه ومفيش زبون اشتكى مننا من اكثر من 10 سنين في السوق كل الزباين بتشكر في شغلنا وبتعاملو معانا علطول .

-       عم علي     :- طيب بكام الشقه ؟ 

- شركة مكافحة الحشرات :- السعر بيعتمد على حسب مساحة المكان اللتر ب 25 جنيه وحضرتك شقتك كم متر تقريبا ؟

-       عم علي     :- لا المساحه صغيره تقريبا الشقة 80 متر . 

- شركة مكافحة الحشرات :- يعني حضرتك هتحتاج 80 لتر محلول من المبيد والحساب بيكون 25x 80= 2000 جنيه وهنعمل لحضرتك خصم عشان انت زبون جديد ويبقى الفاتورة 1500 جنيه

-       عم علي     :- 1500 جنيه ينهار ابيض . .. لا شكرا مش هاقدر ادفع المبلغ ده كللو متشكرين جدا .

- شركة مكافحة الحشرات :- يافندم ده السعر المناسب احنا شركة مشهورة وكل المبيدات اللي بنستخدمها بتيجي من المانيا يعني أصلية ومش مضروبه بس برضو ممكن اعملك خصم كمان وده عشان حضرتك راجل طيب وكويس يبقى انزلك كمان 200 جنيه ويبقى حسابك كللو 1300 جنيه .

-       عم علي     :- متشكرين على ذوقك ياباشا بس برضو المبلغ ده كبير وماقدرشي ادفعه ده كده نص مرتبي راح بقى

- شركة مكافحة الحشرات :- والله ياباشا انا مش عاوز اخسرك وهاعملك عرض ودي اخر حاجه عندي 800 جنيه ونتوكل نيجي نشتغل واديلك الضمان كمان .

-       عم علي     :- انا ممكن دفع 450 جنيه دول كل اللي معايا دلوقتي .

- شركة مكافحة الحشرات :- لا يافندم ما ينفعشي مش هنقدر نشتغل بالسعر ده كده انا خسران .

-       عم علي     :- طيب انا هاشوف شركة تانيه بسعر يمكن اقل منكم ولو ملقتش هابقى اتصل عليك تاني بس انت ما قولتليش اسم الشركة ايه .

- شركة مكافحة الحشرات :- احنا الروسية .. ماشي ياباشا خلاص هنشتغلك قول لنا مكانك فين .

طبعا بعد المكالمة دي أكيد عرفنا واتأكدنا أن دي شركة مكافحة حشرات وهميه من ضمن الناس اللي بيعملو اعلانات وبيقلبو الزبون اللي ما عندوش خبره ومعرفه عن طريقة التعامل مع شركات مكافحة الحشرات .

          ملحوظه  

 في ناس كتير جدا عاملين اعلانات مدفوعه في جوجل ادورد – وعاملين صفحات في الفيسبوك  ودعايه فعلا عالية وقنوات اعلانيه مختلفه – وبينجحو في النصب على الزباين بإنهم شركات ضخمه ومشهوره – للاسف حتى بعد ما يتم الإبلاغ عنهم بتلاقي اعلاناتهم شغاله في كل مكان وناس تانيه بيتنصب عليهم وهكذا ..

هنا بقى عم علي ما لاحظشي موضوع اسم الشركة بس بيقول له الالمانيه وطبعا احنا عارفين كم شركة في السوق مقترن باسم الالمانيه عشان بعد كده لما يحصل مشكلة يربط الألمانيه باسم اخر وهكذا دي نقطه فيها نقطه برضو أنهم دايما بيقولو منتجاتهم من ألمانيا وده كذب وخداع عن تجربه حقيقيه. والنقطه التانيه في موضوع المطبخ اذا عم علي متأكد من أن الصراصير موجوده في المطبخ بس يبقى نوعية الصراصير دي صعب تهرب على مكان تاني ( الصرصور ده نوعه ايه ؟ ) المفروض لو شركة مكافحة الحشرات عندهم خبره كان سأل الزبون طبعا مش عن نوع الصرصور – يسأله مثلا عن اغلب الصراصير اللي بيشوفها شكلها وحجمها تقريبا ولونها كمان ؟ ليه بقى ؟ عشان الخبير بمكافحة الحشرات هيفهم الكلام ده علطول بمجرد ان يسمع اوصاف الصرصور هيقدر يعرف سبب وجود الصرصور وطريقة مكافحة الصرصور ويقوم بتقدير طريقة العمل المناسبة – غالبا في المطابخ والمطاعم لا يستخدم مبيد سائل إلا في فتحات الصرف الخاصه بالمكان – أما اجزاء المطبخ بيتم استخدام جل من نوع عالي الجوده يتراوح سعره مابين 20 دولار الى انواع اخرى قد تصل الى 50 دولار – ودي ضمانها اقل فتره 1 سنة .

خللي بالك – مثلا اذا كان عندك مشكلة بسبب الفئران ( الفيران ) ولقيته بيرش لك مبيد سائل وكده حتى لو حاول اقناعك بأي وسيلة ( إتأكد إنه كاذب ) وفلوسك اللي هتدفعها لشركة مكافحة الحشرات هتروح عالفاضي – لأن مفيش أي مبيد سائل في العالم كللو بيقتل الفيران – لازم يستخدم مكعبات أو قطع على شكل شيكولاته – أو حبوب صغيره في حجم حبة الأرز – أو على شكل مسحوق – كل ده ضروري تثبيته على قطع كرتون معينه – أو لاصقات كرتونيه – أو بوكسات ( صناديق خاصه ) وممكن بأجهزه موجات فوق صوتيه لو بيتك مساحته كبيرة .

وخللي بالك كمان – 

اذا كان عندك مشكلة البق بق الفراش ( حشرة البق ) ممكن تطفش من البيت !! اه تطفش طبعا  

عشان الحشرة دي من الحشرات اللي فعلا بتسبب مشاكل كبيرة سواء للبيوت أو الفنادق و معظم الأماكن – ليه بقى ؟ لماذا ؟ عشان غير أنها بتضر الناس بلدغتها ومصها للدم وبتسبب ورم وحكه وغيره دي بقى بتستخبي في أماكن صعبه جدا زي الملابس ( الهدوم يعني ) في ياقة الجاكت أو القميص وبتحط بيضها كمان في حروف المرتبه وحظك يكون وحش بقى اذا مرتبتك فيها فتحه مهما كانت صغيره الحشرة بتتوغل وتستعمر فيها ومفيش حل غير انك تغيرها وترمي القديمه – بس خللي بالك برضو ! حشرة البق ممكن تستخبي في زوايا السرير الخشب أو اركان وأعمدة السرير الحديد يعني ممكن بعد ما تبدل المرتبه بيومين تلاته تلاقي  نفس المشكلة وتلاقي بقاية طالعه تتمشى كده تدور على شوية دم تمصه من جسمك !! يبقى لازم تدور كويس وتنضف ممكن بمكنسه كهرباء تشفط أي حاجه وممكن برضو بسيشوار شعر تثبته على درجة حراره عاليه عالمكان اللي فيه البق عشان بق الفراش بيطق من الحراره هتسمع تكات كده لما بقايه تموت !!! متقرفش من كلامي وكمل قرايه – خللي الشمس تدخل بيتك من الشباك أو هوي فرش البيت الصبح ساعتين تلاته واذا معندكش بقى وقت تعمل كده يبقى

لازم تتصل بشركة متخصصه للقضاء على بق الفراش إزاي بقى تختار الشركة تعالى هنا

الأول اتاكد ان سعر شركة مكافحة الحشرات لما تيجي عشان بق الفراش هيكون السعر عالي لأن المبيد بتاع بق الفراش غير مبيد الصراصير أو النمل أو العقارب – وبيكون غالي حبتين  

يبقى تسأل الشركه قبل ما ييجو يشتغلو عن التكلفه التقريبيه – ويفضل تطلب منهم  معاينه مجانيه اذا هما قريبين منك وده شغل الشركات البروفشنال ( المحترفين يعني )

اذا الشركه قالولك في التليفون انهم هيخلصوك من البق في نفس اليوم اعمل عليهم علامة اكس ومتسمعش باقي كلامهم !! ليه ؟ البق الطريقه الوحيده اللي تموته في الحال انك تمسك البقاية وتموتها بأي حاجه في ايديك أو زي ما قولتلك بحرارة السيشوار وده صعب عشان بق الفراش صغيرجدا وبيض البق كمان صعب اوي تشوفه بعينيك . نكمل بقى ازاي تتعامل مع الشركة

لازم الشركة تشرحلك دورة حياة البق و البق وفترات تكاثره وعملية المكافحة لازم تتم على كم مرحله ( الموضوع جدي جدي ) ولازم يديك نصايح قبل وبعد عملية إبادة البق عشان لازم تعمل بيها وإلا هتعيش في مستنقع بق بعد فترة شهر ونص تقريبا مش هتطيق المكان ، 

صحيح ممكن تحط نعناع اخضر حول السرير وريحان اخضر كمان – وبرضو ممكن تجيب مسحوق غسيل ريحته قويه وفي كوباية صغيره في ربعها مياه وتخلطهم وتثبت تحت جوانب السرير كذا كوبايه هتلاقي بالليل كده والجو هادئ البق مجنون مش عارف يروح فين عشان الريحه دي بتخنقه .

فيه طريقه تانيه لو حد تعرفه رايح اليابان إسأله عن الجاذب الجنسي نوع من الفرمونات لمكافحة بق الفراش – الصراحه التقنيه دي ناجحه بدرجة 100% طبقتها في دبي ( شرايط زي اقراص الدوا كده ) كل شريط فيه قرصين طبعا اليابانيين فكرو في الفكره من زمان . سعر الشريط 55 دولار عشان كده بيستخدموه في الفنادق الكبيرة والمصانع والمخازن اللي بتتعرض لخسارة منتجاتها بسبب البق او السوس بأنوعه .

ياريت أكون وصلتلكم معلومه مفيده انهارده .... ربنا يقدرني وأطور من نفسي بتشجيعكم ليا معايا هتلاقي حلول كتير وايميلي موجود لو عندك أي مشكلة حشرات قبل ما تتصل على شركة إبادة حشرات في أي مكان سواء في مصر – الامارات – الكويت – قطر – سلطنة عمان – السعودية 

هاقدر باذن الله اساعدك في حل المشكلة مجانا واذا مقدرتش تتابع معايا ومعندكش وقت ممكن ادلك على الطريقة اللي هتتعامل بيها مع شركة مكافحة حشرات في اي دولة عشان تحل مشكلتك